Fréttir

Líffræðiráðstefnan 2009 10. nóvember 2009 Ráðstefnan var hin glæsilegasta og voru alls kynnt um 220 framlög í formi erinda og veggspjalda. Á heimasíðu ráðstefnunnar má m.a. nálgast útdrætti allra þessara framlaga. Þar kemur einnig fram að um 390 manns hafi komið að þeim rannsóknum sem kynntar voru. Þátttakendur á ráðstefnunni voru um 250, en til gamans má geta þess að ríflega 1000 manns hafa lokið grunnnámi í líffræði hér á landi. Eins og áður segir var starfsfólk Náttúrufræðistofu Kópavogs á meðal þátttakenda á ráðstefnunni og hélt fjögur erindi þar sem kynntar voru rannsóknaniðurstöður og nemendaverkefni sem unnið er að á Náttúrufræðistofunni. Þrjú þeirra áttu það sammerkt að umfjöllunarefnið var langtímavöktun í stöðuvötnum, en það fjórða fjallaði um svipfarsrannsóknir á hornsílum. Hér að neðan má nálgast erindin á PDF formi. Hilmar J. Malmquist fjallaði um hækkandi vatnshita í Elliðavatni, orsakir þessarar hækkunar og fækkun bleikju, sem hefur haldist nokkuð í hendur við hinn hækkandi hita. Hlýnun Elliðavatns og fækkun bleikju í vatninu (5 MB). Finnur Ingimarsson fjallaði um vöktunarverkefni sem unnið er að í Þingvallavatni. Þar er fylgst með vatnshita, súrefnismettun og leiðni, ásamt dýra- og þörungasvifi, frá yfirborði og allt niður á 50m dýpi. Vöktun á lífríki og vatnsgæðum Þingvallavatns (1.4 MB). Haraldur R. Ingvason fjallaði um vöktun á vatnshita, súrefnismettun, leiðni og blaðgrænu-a í nokkrum vötnum á höfuðborgarsvæðinu. Vöktun eðlisþátta í vötnum á höfuðborgarsvæðinu (5,5 MB). Rakel Júlía Sigursteinsdóttir (M.S. nemi) kynnti nokkrar niðurstöður úr rannsóknarverkefni sínu sem lítur að fjölbreytileika í svipgerð hornsíla í íslenskum vötnum. Hornsíli; ekki bara lítill fiskur með gadda (1,4 MB).

Til baka