Um okkur Náttúrufræðistofa Kópavogs var opnuð í desember 1983. Hlutverk Náttúrufræðistofunnar er að safna, varðveita og sýna náttúrugripi, standa að fræðslu og rannsóknum í náttúrufræðum og stuðla að náttúru- og umhverfisvernd. Árni Waag var ráðinn fyrsti forstöðumaður stofunnar, en núverandi forstöðumaður er Hilmar J Malmquist og tók hann við starfi af Árna árið 1992. Tilurð Náttúrufræðistofu Kópavogs má rekja til kaupa Kópavogsbæjar á skeldýrasafni Jóns Bogasonar en hann hafði um langt skeið safnað skeldýrum meðfram störfum sínum sem rannsóknamaður hjá Hafrannsóknastofnun. Er þetta skeldýrasafn einn kjarni í náttúrugripasafni Náttúrufræðistofunnar. Á tímum Árna Waag myndaðist einnig töluvert fuglasafn og á síðustu árum hefur einnig orðið til gott safn af berg- og steintegundum. Í maí 2002 fluttist Náttúrufræðistofa Kópavogs í hið nýja safnahús að Hamraborg 6a og deilir því með Bókasafni Kópavogs. Húsið er sambyggt Salnum í Kópavogi, við hlið Gerðarsafns. Staðsetningin er sérlega góð m.t.t. strætisvagna, en aðeins eru fáein skref að skiptistöðinni við Hamraborg. Húsnæði Náttúrufræðistofunnar er hið fyrsta á landinu sem er hannað frá grunni fyrir náttúrufræðisafn og gerbreytir sýningaraðstöðu á safnmunum og stórbætir möguleika á allri þjónustu. Rannsókna- og vinnuaðstaða fyrir starfsmenn er mjög góð og sama er að segja um aðstöðu til að taka á móti hópum og skólafólki, til dæmis vegna kennslu í náttúrufræðum. Kópavogsbær hefur staðið að rekstri stofunnar, en einnig hefur hún aflað verulegra sértekna. Um þetta og margt fleira má fræðast í ársskýrslum stofunnar. Í kjölfar breytinga á starfsemi með tilkomu hins nýja húsnæðis, var ný stofnskrá fyrir Náttúrufræðistofuna samþykkt í bæjarstjórn Kópavogs í febrúar 2003 . Hér er að finna stofnskrá Náttúrufræðistofu Kópavogs ásamt ársskýrslum frá árinu 1993. Rannsóknir eru stór hluti af starfsemi Náttúrufræðistofunnar og eru þær einkum á sviði vatnavistfræði. Meðal verkefna sem unnið hefur verið að má telja: -Yfirlitskönnun á lífríki íslenskra vatna, -Vöktun á murtustofninum í Þingvallavatni, -Vistfræði skötuormsins, -Umhverfisúttekt á Ástjörn og Hamarskotslæk í Hafnarfirði fyrir Hafnarfjarðarbæ, -Úttekt á vatnalífríki á áhrifasvæði Kárahnjúkavirkjunar fyrir Landsvirkjun og Náttúrufræðistofnun Íslands, -Vöktun á lífríki Elliðavatns fyrir Reykjavíkurborg og Kópavogsbæ. Þá eru einnig í gangi rannsóknaverkefni sem tengjast framhaldsnámi í líffræði til masters og doktorsgráðu. Hér má fræðast frekar um þessi verkefni. Á náttúrufræðistofunni hefur einnig verið aðsetur eftirlitsráðgjafa Náttúruverndar ríkisins og hefur Hilmar forstöðumaður gengt því starfi.