Í anddyri Náttúru- fræðistofunnar eru nú til sýnis lifandi slorpungar og steingervingar af frændum þeirra, strýtuþörungum. Nafngiftirnar vekja eflaust nokkra eftirtekt, en um er að ræða sambýli svokallaðra blágrænna baktería.

Strýtuþörungar eru meðal elstu og frumstæðustu lífvera jarðarinnar en blómaskeið þeirra var á forkambríum, tímabili sem spannar 3.800-545 milljón ár fyrir tímatal okkar. Í dag eru þeir fágætir en finnast þó á stöku stað.

Slorpungar, eins og þeir sem sjást á meðfylgjandi mynd, eru hins vegar nokkuð algengir m.a. hér á landi. Oftast finnast þeir í ám og vötnum en sumar tegundir finnast einnig uppi á landi þar sem raka gætir. Stærð slorpunga er misjöfn, allt frá títiprjónshaus og upp í þokkalega kartöflu. Litur þeirra er oftast eitthvert afbrigði af grænu  en getur verið frá appelsínugulum yfir í nær svart.

Ljósin verða tendruð á vinabæjarjólatré Kópavogsbúa á Hálsatorgi, laugardaginn 26. nóvember, kl. 16:00. Jólatréð er gjöf bæjarbúa í Norrköping í Svíþjóð til Kópavogsbúa. Sendiherra Svíþjóðar, Anders Ljunggren, afhendir tréð og Hjálmar Hjálmarsson, forseti bæjarstjórnar, tekur á móti því fyrir hönd bæjarins.

Skólahljómsveit Kópavogs og Samkór Kópavogs spila og syngja jólalög og nokkrir jólasveinar taka forskot á sæluna og kíkja í heimsókn.

Að venju verður fjölbreytt dagskrá í næsta nágrenni í tilefni dagsins. Jólakötturinn verður m.a. á kreiki í Bókasafni Kópavogs og dýrin í Náttúrufræðistofu Kópavogs skrýðast jólabúningi. Næstu tvær vikurnar verður leikskólum Kópavogs svo boðið í heimsókn á Bókasafnið og Náttúrufræðistofuna til að kynnast jólakettinum enn frekar.

Hér má finna dagskrá aðventuhátíðarinnar.